ДА ЧЫТАЧА

Вы трымаеце ў руках трэцяе выданьне кнігі "Катихисісъ, то естъ наука стародавная хрістіаньская от Светого Писма для простыхъ людей языка руского въ пытаніахъ и отказехъ събрана". Першы раз яна пабачыла сьвет у Нясьвіжы ў 1562 г.
"Катэхізіс" у XVI ст. быў шырока вядомы ў Вялікім Княстве Літоўскім, у Польшчы, у Маскоўскай Русі, нават у Швэцыі.
Вядома, што ў 1628 г. "Катэхізіс" быў перавыдадзены ў Стакгольме.
Аднак сёньня "Катэхізіс" С. Буднага зьяўляецца бібліяграфічнай рэдкасьцю, зь якой маюць магчымасьць азнаёміцца толькі нешматлікія дасьледчыкі.
Таму ў 2002 г. ў межах праграмы па сьвяткаваньні 450-годзьдзя Рэфармацыі ў Беларусі распачалася праца па адаптацыі тэксту "Катэхізісу" і перакладу яго на сучасную беларускую мову, каб ня толькі людзі вучоныя, але і паспалітыя маглі пазнаёміцца зь ідэямі і вучэньнем беларускіх рэфарматараў XVI ст.
І вось зараз мы з радасьцю прадстаўляем шаноўнаму чытачу плён працы многіх людзей, "каб прагнучыя мелі разуменьне ўсіх Словаў Божых і Ягонай праўды, каб гэтаму і самі вучыліся, і дзяцей сваіх навучылі".