Пытаньне

Растлумач больш пераканаўча, каб я зразумеў прычыну: хіба Бог больш за работу любіць гультайства?

Адказ

Не дзеля таго загадаў Бог сьвяткаваць сёмы дзень, што Ён любіць гультайства, а працы ня рады, бо, высылаючы Адама з Эдэму, даў яму закон, каб у поце твару свайго еў хлеб свой ды працаваў на зямлі ва-ўсе дні жыцьця свайго (Роду 3); але дзеля таго, каб меў чалавек пэўны дзень, у які б вучыўся Слову Божаму ды займаўся сьвятымі справамі. Таму ў гэтым слове Бог загадвае ня так проста гэты дзень марнаваць ды ўвогуле анічога не рабіць, але загадвае гэты дзень сьвяткаваць.

А «сьвяткаваць» азначае ня час марнаваць або анічога не рабіць, але сьвятыя справы чыніць. Справы ж сьвятыя ёсьць тыя, што Бог загадаў рабіць, напрыклад, Слова Божае слухаць, міласьціну даваць, Богу маліцца ды іншыя. Вось чаму ў гэты дзень Бог забараняе рабіць не справы сьвятыя, а толькі справы мірскія, або сьвецкія, мінаючыя, уласьцівыя гэтаму жыцьцю. Ды, зноў жа, загадвае нам рабіць справы сьвятыя, як ужо я і казаў.