30.11.2003. Берасьцейская царква ЭХБ сьвяткавала юбілей Рэфармацыі ў Беларусі.

28, 29 і 30 лістапада берасьцейская царква ЭХБ сьвяткавала юбілей Рэфармацыі ў Беларусі. На кожным набажэнстве зьбіраліся калі 800 чалавек, так што шматлікім прысутным не хапіла месца ў залі, таму ў іншым памяшканьні давялося рабіць тэлетрансьляцыю.

Пастар царквы Анатоль Канючка сярод іншага адзначаў, што многія жыхары Берасьця ўпершыню пачулі пра Залаты Век Беларусі і пра тое, што ля яго вытокаў была духовая Рэфармацыя, якая закранула ўсе сфэры жыцьця грамадзтва.

Перад вернікамі меў слова дэпутат Іван Пашкевіч, які казаў пра тое, як пачутая ім гісторыя Рэфармацыі ў Беларусі паўплывала на яго погляды. Царква падрыхтавала насычаную канцэртную праграму, у межах якой выступілі аб'яднаныя зводны і мужчынскі хоры, а таксама тэатральная пастаноўка "Адкрыцьцё Лютара".