КАТИХИСIСЪ
для детокъ хрiстианьских языка Руского коротко выложена

ПЫТАНЬЕ

Говори осмое слово Божіихъ заповедей.

ОТКАЗЪ

Осмое слово естъ "Не оукрадеши".

ПЫТАНЬЕ

Яко тое розумети маю? Чого нам зде боронить Богъ?

ОТКАЗЪ

Хочеть Богъ, абы каждый человекъ маетность свою мелъ у моцы своей. А одинъ у друга абы хитростию, здрадою, пеняньемъ и коемъ ли иным обычаемъ не бралъ. Опять, и тое ся тут же замыкаеть, абыхмо часу потребы ближному нашему маетности наших уделяти не жаловали. Бо на том мало, естли бы кто чужого не бралъ, а своего бы убогому не узычалъ.

Обе речи маеть хрістианинъ заховати: напервей - абы чужого не хотелъ, а другаа речь - абы своее маетности, где надобе, дати не жаловал. Кто потому не чинить, той противу того слова грешить.

ПЫТАНЬЕ

Которие суть грехи противу тому слову?

ОТКАЗЪ

Яко розные суть межи людей станы, або повинности, тако розные и грехи противу тому слову, или злодейства. А мает ли ся, правда мовити, редко не въ всих станехъ найдуется злодейство. Возри напервей на станъ учительскій, або Пастырскій - вси ли верне пасуть стадо Хрістово? Вси ли правды оучать? Не большая ли част у учителей, которіи для чрева безлепицъ учять? Пастири пакъ не себе ли пасуть? Укажи ми, прошю тебе, Епископа, который бы Слово Божіе проповедалъ. Лечь я ведаю, такового у сих сторонах ни одного не знайдешь. Многых найти можешь, што ся на Епископие, на Митрополие, на Архимандрие накупуютъ, але который бы Словомъ Божіемъ стадо Хрістово паствилъ, укажи ми одного. А как же ихъ назвати? Ведаю, яко ся вамъ гневати, але васъ предся Самъ Хрістос розбойниками и татьми, се естъ, злодеями, зоветь. Бо так рече: "Не входяй дверми въ двор овчій, но прелазяй инуде, тъй тать естъ и разбойникъ, а въходяй дверъми, пастырь естъ овцамъ" (Іоан 10:1-2).

Оже маешъ, яко таковых Хрістос зоветь, которіи не про двери до овецъ входять, але инуды, то естъ черезъ посулы приходять на Епископие або на иншые пастырства. Прото напервей ся злодейство межи духовных пастыровъ находить. А ешче и тое обачити треба, яко не просто злодейство пополъняють, але двойчасто. Бо иже не наоучають, крадуть правду пред людьми. А другое злодейство, иже именья церковного вживають, а за тое досыть не чинять. А тымъ обычаемъ и в духовных, и в дочасных речахъ окрадают убогих хрістианъ.

Потому жь о преложоныхъ светских розумей, естли бы, на звыклых приходехъ не переставаючи, не по мере подачки на подъданыхъ вымышляли, наболей безъ военное потребы.

Крадуть подданые пановъ своих, если им подачков несправедливе отдавают, естли незычливе робять або иныхъ повинностей своихъ не делають.

Крадуть ремесники, если непобожне свою роботу продають. Крадуть купци и торговци, которие злыми товари людей подманывають, або за малую цену у простых людей какую речь беруть.

Крадуть которие хлеб напрасно едять а ничого не робять. Крадуть калеки, которіи, могучи роботою покоръмитися, не хотять робити, але жебрують.

Крадуть лихвяри, которіи взаем грошей давают, але от них гостинци або резъ, то естъ лихву, беруть.

Крадуть костыри и вси игрячи, которіи костками, або картами, або чимъ инымъ маетности чужіе отнимають.

Крадуть мытници, если большей, нежели имъ уставлено, вытягають.

Крадеть панъ, которій слузе мыта заслужоного не платить.

Крадеть слуга, если господину своему не потому, якобы мело быти, служить.

Крадеть, кто на вряде седить а злодей не караеть, яко Богъ велелъ.

Коротко говорячи, вси люди сему слову пред Богом долъжни, которие кажному што чие естъ, не отдають або своего потребному не уделяють.

ПЫТАНЬЕ

Которие суть добрие дела того слова?

ОТКАЗЪ

Напервей перестати на том, што Богъ далъ. Потомъ отдати кажному, што его естъ. А третее доброе дело естъ чинити милостину. К тому от грошей ничого не брати.

ПЫТАНЬЕ

Кому маеть быти давана милостина?

ОТКАЗЪ

Въ обычай собе зде в наших краинахъ люди леные взяли: кто робити не хочеть, у калеки идеть, хотя жь будеть здоровъ, и молод, и тако з милостины живеть. Но не добрь естъ таковъ обычай, и мели бы преложоные таковых людей оуняти, абы имъ не было волно калековати, або, правду рекъши, зводити и под покровом убожества красти.

И ест того великие причины, для которих маеть имъ урядъ того боронити. Напервей, ижь Богъ всемъ здоровымъ людемъ робити велелъ и от працы своее выховатися, яко къ Адаму Самъ поведелъ: "В поте лица твоего снеси хлебъ свои" (Бытя 3:17). Апостол опять рече: "Аште кто не хочеть делати, да не ясть". (Деан???). Другая причина естъ. Бо людъ простый только тымъ милостину даеть, которіи могуть берати, а затым правдивые калекы голод терпять. Прото, мовлю, на урядъ належить, абы таковымъ здоровымъ калекам заборонно было милостины и просити, и брати. А ижь бы ихъ к роботе приставляно. Абы пред правыми калеками не крали милостины, а сами бы тежь свой хлебъ ели.

Милостина пакъ маеть быти давана. Напервей, где суть діакони, - до диаконовъ. Бо их урядъ естъ не кадити, ани што иного чинити, але только милостину съберати, а убогих стеречи, абы якое нужи не терпели. О чом в Деаніах Апостольских достаточне выписано. Мают теже з милостины и учители жити, яко Христос рече: "Достоинъ ест делатель мьзды своея" (Мат. 10:10). Потому жь и Апостолъ сведчить, яко Господь повелел проповедаюшчимъ благовестіе от благовестиа жити. А на ином месте пишеть: "Да уделяет же оучайся словеси учашчому и от всего добра" (Гал. 6:6).

Теже милостина маеть быти давана всемъ убогимъ, старимъ, немошчным, молодымъ недужимъ, сиротам, вдовам старимъ и онымъ, которихъ Богъ скараеть або огнемъ, або войною, або иною шкодою. Яко о Іове написано, иже и друзи его по оныхъ шкодах и многых страстьях даровали по грошу, або, яко неціи превели, по овцы и по златой серазе (Іовъ, 42).

ПЫТАНЬЕ

Годить ли ся Церквамъ мети именіа або доходы?

ОТКАЗЪ

Церковъ для трех причинъ маеть держати або приходы, або именья. Первая причина, абы служители мели выхованье. Другая причина, абы училишча или школы быти могли. Бо наставником платити потреба, а часом и ученником убогимъ докладати церковъ мусить. Третяя причина, аби нишчимъ было выхованье. Тых причинъ деля потреба, абы были церковныя наданья нерушоны. А не только не мають быти нарушены, але естли бы где таковыхъ доходовъ мало, повинни Князи и иныи господари опатрити, абы доволно было. Бо Ісаія пишеть, яко Цари мають быти церквамъ доителе, а княгыне - кръмителе. Да вед же таковые данины або именья не мають быти у Епископа или у Господаря въ руках, но Діакони, на тое от верныхъ избраніи, мають оныя заведати. То естъ учителей, школы и больницы выховати. На сие бо потребы исперва надавали благоверни Цари и Князи такова имениа.

ПЫТАНЬЕ

Годитъ ли ся Хрістіанину мети свое именье або маетность? Пишеть бо Лука в Деаніах, яко первіи Хрістіане обшчая вся мели.

ОТКАЗЪ

Божественный Лука оубо пишеть сие только о церкви, которая была въ Іерусаліме (Деа. 1:12-26), але о іных церквах того не пишеть, абы хрістіане вси речи за обшчие межи собою повинни мети. Да вед же и въ Іеросолимской церкви не узаконили того были Апостоли, але з любви сее чинили: которіи на онъ час былі хрістіане, продавалі именія своя и цену до Апостолъ относили. Особливая то Святого Духа наоука тогды была. Ведаючи бо Духъ Святый, яко Іерусалимъ Римляне розорити и спустошити мели, слушне оныхъ хрістіан тому наоучилъ, абы пред часом именья своя продали, а потребамъ убогыхъ пособили.

Памятали бо на слово Христово которое на град Іерусалимскый прорече: "Прійдуть дніе на тя, и обложють врази твои острогъ о тобе, и обыдут тя, и обыймуть тя всюду, и разбиють тя, и чада твоя в тебе, и не оставять камень на камени в тобе" (Лук.13:43-44). Тая была причина оным Хрістіаномъ въ Іерусалиме, иже продали своя имениа, и покладали до Апостолъ, и вси речи мели за обшчая.

Тепер пакъ того ненадобе, абы маетности свои хрістяне продавали, але надобе, абы другъ друга любилъ, а часу потребы маетности ему не пошчадилъ. Бо и за Апостолъ, хрістіане каждый свое именье держалъ, а с него милостину на учители и на убогые давалъ. Такова была Тавифа, Корнилей и прочіи. Прото и Апостол о богатых Тімофею тако пишеть: "Богатым в нынешнемъ веце запрешчай не высоко мродствовати, ниже уповати, на богатество изгыбаюшчее, но на Бога живаго, подаюшчего нам все обильно" (1Тім 6:17).

Выгледи, яко не рече Апостолъ: "Богатым запрешчай не мети богатества", але не уповати на богатества а невысоко разумети". Соломоном Духъ Святый наоуку достаточъную о том даеть сими словы: "Да исходять ручаи твои вонъ, и на улицахъ воды твое дели, но источникъ воды твоея да будеть тобе самому" (При 5:15-16). Велить зде ручаи от источника вонъ пушчати, се естъ, маетностей своих убогым уделяти, але источникъ велить самому мети. Розумей, яко надобе при собе маетность ховати. Бо естли бы кто заразъ все именье покинулъ или кому отдалъ, не будеть напотомъ мети, откуле бы милостину дати, и самъ мусить у иных хлеба просити.

Прото годиться хрістіанину свою маетность мети, нижели потреба, абы ся справедливе достала, а к тому абы таковый милостину давалъ. Яко Хрістос рече: "Сушчаа дадите миластиня, и се все чиста вамъ будеть" (Лук. 11:41).

ПЫТАНЬЕ

Што онымъ Богъ обецалъ, которіи послушніи сего осмого слова?

ОТКАЗЪ

Которіи того слова послушни, то естъ которіи на своихъ маетностяхъ переставають, чужое речи не жадають, а з маетностей своих милостину дають, тымъ Бог и зде достатокъ выхованья, и у другом животе спасеніе обецуеть. Напервей такови мають выхованье, яко у Псалтыри написалъ Давыдь: "Праведникъ милуеть и даеть". А мало нижей: "Младшій быхъ и сесътарехся, и не видех праведника оставлена, ни семени его просяшча хлеба. Весь день милуеть и в заемъ даеть праведный, и семя его въ благословении будеть" (Псалом 36).

О таковыхъ Самъ Хрістос рече: "Блажени милостивіи, яко тіи помиловани будуть" (Мат. 5:7). Таковым на суде Сам Спасителъ речеть: "Прійдите, благословении Отца Моего, наследуйте оуготованое вам Царствіе от сложеніа миру. Възалках бо ся и дасте Ми ясти, въжадахся и напоисте Мя, сраненъ бехъ и въведосте Мене, нагъ и одеясте Мене, боленъ и посетисте Мене, въ темници бех и пріидосте къ Мне" и прочаа (Мат. 25:35-36). А мало нижей: "Понеже сътвористе единому от сих братій Моих менших, Мне сътвористе".

ПЫТАНЬЕ

Яко Богъ оныхъ караеть, которіи противу тому Слову чинять?

ОТКАЗЪ

Розные суть грехи противу тому Слову, яко вышшей речено, для того теже и каранья суть або бывають розные.

Напервей лакомых людей караеть Богъ зде, на земли, недостатком и нишчетою. Тако бо Соломон пишеть: "Мужь, хотяшчий скоро обогатитися и инымъ завидить, не знаеть, яко на него прійдеть нишчета" (Притчи 28). А мало пред тымъ рече: "Кто поспешаеть убогатитися, не будеть безъ вины". Ешче той же рече: "Кто зобижаеть нишчаго приспорити собе имения, отдасть потом богатъшему, а самъ обнишчаеть" (Притч 22).

Явные суть сие сведества, яко Богъ караеть на сим свете, они же на сее осмое слово не паметують, але далеко горшей на ономъ свете обецалъ таковыхъ карати. То есть всехъ немилостівых, которіи ближному часу потребы не пособляють, теже татевъ, лихоимцовъ, обидниковъ осудить Богъ въ вечную муку. Яко у Святом Евангелию написано, иже на оном страшном суде речеть Царь сушчіимъ о левицы Его: "Идите от Мене, проклятіи, въ огонь вечный, оуготованый діаволу и аггеломъ его. Възалкахъ бо ся и не дасте Ми ясти, въжадахъся и не напоисте Мене, страненъ бехъ, и не въведосте Мене, нагъ и не одеясте Мене, боленъ и в темници и не посетисте Мене" (Мат. 25 ). А мало нижей: "Понеже не сътвористе единому от сих меншиих, ни Мне сътвористе, и идуть сіи в муку вечную".

Потому жь Апостолъ пишеть: "Не льстите ся, ни лихоимци, ни татие, ни пианици, ни злоляици, ни хишчници Царствіа Божіа не наследать".

Соломонъ о немилостивых тако пишеть: "Кто замыкаеть ухо свое, когда вопиеть нишчий, той сам вопияти будеть и не оуслышится" (Притч 21).

ПЫТАНЬЕ

Говори девятое Слово Божіих заповедей.

ОТКАЗЪ

Девятое слово естъ: "Не посведчишь на своего ближного сведества лживого".

ПЫТАНЬЕ

Яко ся сее слово разуметь, або чого по насъ Богъ хочеть у томъ слове?

ОТКАЗЪ

Того по насъ Богъ хочеть у том Слове, абы есмо на всякъ часъ правду заховали, знали, говорили и чинили противу ближному нашему.

ПЫТАНЬЕ

Которие суть добрие дела того Слова?

ОТКАЗЪ

Напервей о кажном у собе добре розумети, а на своей совести уквапливе никого не осужати. Пред правом або пред судом правду сознавати. Оумовы, приреченья крепко держати. Славу добрую о кажномъ пушчати. Слова всехъ на добрую сторону выкладати.

ПЫТАНЬЕ

Которие суть злые дела того слова?

ОТКАЗЪ

Всякая неправда валчить на тое слово. Напервей грех естъ, або злое дело, противу сему слову у себе на своей совести о комъ зле розумети.

Грех естъ пред судом иначей, нежели было, съзнавати, хотя жь и на отца або на иного съродника или племеника.

Грех естъ приреченья, угоды, записы, присяги и всякие умовы ламати.

Грех естъ на славе доброй кого казити.

Грех естъ чии слова ницовати, абы што у добрыи обычай кто рече, на злы розумъ опорочати.

Грехъ естъ невинного до права потягати.

Грехъ естъ винным будучи до права дати ся позывати.

Грехъ естъ о несправедливую речь у праве от кого говорити.

Грехъ естъ с правды неправду, або з неправды правду діалектікою або риторікою учинити.

Грехъ естъ ласкаве ся кому словомъ обецовати, а на сердци зло ему мыслити або его не любити. Таковых людей тепер ест много. И вся неправда грехъ естъ противу тому девятому слову.

ПЫТАНЬЕ

Ино не годиться и пастыром або учителем греховъ обличати? Бо и Христос рече: "Не судите, да не осужени будете".

ОТКАЗЪ

Сие Слова не стоять напротиву судьям, пастыром, родителемъ и иным таковымъ особамъ, але только възбраняють, абы другъ друга не соромилъ а не потворал.

Опричных судовъ боронить Господь, а не врядовыхъ, ани тыхъ, которые з любви братерское походять. Бо на тот обычай Самъ Хрістос судити або обличати велить. Яко в Матфею написано: "Ашче съгрешить к тебе братъ твой, иди, обличи его междоу собою и темъ единемъ". Пророку теже Самъ Богъ повелел людей своих грехи оповедати. "Возопій, рече, крепостію и не пошчади. Яко труба възнеси глас свой, и възвести людем Моимъ грехы ихъ и дому Іаковлю безакония ихъ". (Ісаіа 58). Естъ бо уряд Пророческій, Апостолскій и всех учителей грехы людемъ оказовати, абы от них бегали. Прото Креститель Хрістовъ Іоаннъ обличал Ирода (Мар. 6:17-20), Пророци - лжепророкы, Хрістос Самъ и Его Апостоли и Стефанъ обличали фарісеи и всехъ лицемерей (Деан. 6:7). Але на том перестаньмо.

ПЫТАНЬЕ

Естли всякая ложь - грехъ, ино Авраамъ съгрешилъ коли, пришедши въ Египет, не сказалъ, абы Сарра жона его была, але ее сестрою своею звалъ (Быт. 12, 20, 26)? Тое жь учинилъ, коли гостилъ въ земли Герарской. Потому жь учинилъ и Ісаакъ в той же земли Герарской.

ОТКАЗЪ

Иншая речь естъ ложь, а иншаа - потребное утаенье. Ложь бо естъ, коли кто правъду отменяеть в неправду, хотячи тако ближному зло учинити, або ему ушкодити. Кто бы тако чинилъ, винен бы сему девятому слову. Лечь святіи мусели под час некоих делъ таити, абы тым обычаем горшимъ речамъ вины не дали. Яко на взор маешь бабы Еврейские (Исход 1), которие пред Царом Египетским на жоны Еврейские сложили, яко бы оные при роженью детокъ бабъ не требовали. Не была то правда, але добре бабы учинили, абы потому от окрутного повеленья Царева волные были. Бо имъ былъ Царь велелъ весь полъ мужескій у Евреянокъ убивати. А ижь оные бабы у том не съгрешили, свечить Дух Святый Моисиомъ, где тако пишеть, ижь для того учинилъ Богъ добре бабамъ тымъ. Потому же учинила Раавъ (Ісусъ Нав. 2) въ Іерихоне, коли послал к ней Цар Іерихоньскій, абы выдала выгледачевъ Ісусъ Навиновых, скривши их, сказала, ижь вышли изъ города. Да вед же у том не съгрешила, ани можеть сее за ложь почитати, понеже тое потребъне учинила, абы тако животъ оныхъ шпегов оборонила. Тым же обычаемъ некая жона Ахимаасу и Енафану, шпегомъ Давыдовымъ, учинила (2 Цар.17). Затаивши бо их у колодези, сказала слугам Авесоломовым, ижь пошли, напившися мало воды. И иных много есть таковых взоровъ у Святомъ Писанию. Прото надобе разность знати межи лжою а потребнымъ утаеньемъ. Ложь не только естъ утаенье правды, але к тому причиненье неправды къ шкоде или кривде невинного человека. Опять, утаити чого для пожитку невинного не естъ ложь ани грех, але естъ милосердие. Авраамъ не для того Саррю сестрою звалъ межи чужих людей, абы имъ што злого мыслилъ, але абы только самъ безпеченъ от нихъ был. Прото ани лгать у тои мере, ани грешилъ. Да вед же паметуй, яко всякаа ложь грех естъ, если бы не за великою потребою была, яко похлебство, або коли кто безпотребне только або для звычаю, або для тошчое славы небылые речи кажеть. От такового звычая винен ся человекъ гамовати. Хрістос бо рече: "Буди слово ваше ей, ей, ни, ни" (Мат.4). Лихое же сея от непріязни естъ.

ПЫТАНЬЕ

Карает ли Богъ оныхъ, которіи противу сему слову девятому чинять?

ОТКАЗЪ

Понеже Сам Бог естъ истинная правда, не можеть любити лжи и всякое неправды. И того для, всех ложь и неправду говорачих обецалъ карати и караеть по вси часы. Яко написано: "Погубиши всех, глаголюшчихъ лжу" (Псалом 5). Соломонъ теже рече: "Сведетель лживый не будеть без помсты, и кто направду молвить, не съкриется" (Притч. 19:5). И опять, той же пишеть: "Сведитель ложенъ погибнеть" (Притч. 21:28). И маемь на взорь Ананию и Самфірю, его жону, которых Богъ наглою смертію лжи деля скаралъ (Деан. 13).

ПЫТАНЬЕ

Што оным будеть, которіи тому слову послушни?

ОТКАЗЪ

Великие заплаты обецуеть Богъ у слове Своемъ тымъ, которіи бы правду и знали, и говорили. Яко напервей естъ у псалме 14 написано: "Господи, кто обитаеть в жилишчи Твоем, или кто вселится в горю святую Твою. Входяй безъ порока и делая правду. Глаголяй истину въ сердци своем, иже не у льсти языком своимъ. И не сътвори искренему своему зла, и поношенія не пріять на ближния своя". А мало нижей рече: "Кленыйся искрнему своему и не отметая ся. Творяй сия, не подвижется въ веки".

Лепшие заплаты быти не могуть, яко которіе зде Духъ Святый обецуеть. Напервей бо обецуеть Царствіе Небесное, а потом добрую совесть. А на ином месте Духъ Святый тако рече: "Кто ест человекъ, хотяй живота, любяй дние видети благы. Удержи языкъ твой от зла, и устне свои, еже не глаголати льсти" (Псалом 33). Зде опять обецуетъ и животъ долгы, и достатокъ къ выхованью оному, кто бы языку своему воли не дал.

ПЫТАНЬЕ

Говори десятое слово Божіих заповедей.

ОТКАЗЪ

Десятое слово естъ: "Не похочеши жоны ближнего своего, и ни дому его, и ни поля, и ни паробка, и ни невольницы, и ни вола, и ни осла, и ни чего, што его естъ".

ПЫТАНЬЕ

Чого Богъ по нас у том слове хочеть?

ОТКАЗЪ

Хочеть, абыхмо о Его Законе иначей розумели, нежели о человечихъ законехъ. Человечие бо уставы або законы делом только зла чинити забраняють, а того за справедливого поличають, кто бы оные зверъху только чинилъ. Але Законъ Божій не только делом зла чинити заказуеть, но того по кажном хочеть, абы не сердцомъ, ни помысломъ, ни хотеньемъ противу ему выстповалъ. А кто бы тому досыть чинилъ, то естъ николи не похотелъ, того Законъ Божій за невинного поличаеть.

ПЫТАНЬЕ

Чи можеть человек того довести, абы не похотелъ або не пожадалъ?

ОТКАЗЪ

И сами по собе знати можемъ, и Слово Божіе сведчить, яко не можеть никто тому досыть учинити, абы в немъ похоти не было.

ПЫТАНЬЕ

Естли бы того никто исполнити не моглъ, для чого жь Богъ далъ сию заповедь?

ОТКАЗЪ

Не только сее заповеди, але иныхъ всех исполнити человекъ не можеть. Бо кажная заповедь достаточного выполненья потребуеть и хочеть, яко вже мовили есмо, а человекъ утратилъ таковую силоу, ставшися подданый греху. Яко и Апостолъ тую же вину даеть, где рече: "Закон духовенъ естъ, азъ же плотенъ" (Рим. 7:14).

Прото не для того Богъ далъ Законъ, абы и человек выполнити могъ, але наболей абы позналъ и обачилъ недостаток свои. А обачивши, абы у собе не уповалъ, але бы где инде лекарства и спасенья искалъ. А для лепъшего вырозуменья обачь а паметай, ижь троякій естъ пожитокъ Закона - наказание, которого и добрим, и злым потреба. Хочеть бо Богъ, абы зліи люди были гамовани и карани. А добрим потреба науки и наказанья, наболей молодым людемъ и простымъ. Другый пожитокъ Закона - къ обличанью греховъ и престрашанью совести. О чом Апостолъ пишеть: "Законом познание греха". А на иномъ месте: "Законъ гнев съделавяеть. Бо естлибы никакова закона не было, а почем бы знати грехъ?" (Рим. 4:15).

Третій пожитокъ Закона оправданымъ, абы ведали, которие дела чинити винни. Бо хотя жь слободни суть от Закона, абы их не осужалъ, але от того не волные, абы могли чинити, што бы хотели. Просто Хрістос поведелъ: "Не прійдох разорити Закона" (Мат. 11).

ПЫТАНЬЕ

Што надобе при кажъномъ слове заповедей Божіих обачати?

ОТКАЗЪ

Чотыри речи при кажномъ слове потреба обачати и паметати. Первая речь - што нам чинити велітьи чого боронить. Другая речь - къ которому концу. Третяя речь - естли бы есмо могли выполняти. Четвертая - яко Богъ любить недостаточное выполнянье.

О первой речи мели есмо при кажномъ слове. О другой пакъ маем ведати, ижь кажьная заповедь к тому концу от Господа Бога естъ подана, абыхом ся Его бояли, а што Онъ велелъ чинили. О третей речи маем ведати, яко есмо теперъ розмавляли, то естъ ижь таковъ человекъ не былъ на свете, ани естъ, ани будетъ, которій бы достаточне Законъ выполнилъ, а не рекучи весь Закон, але единому слову николи никто досыть учинилъ. Кроме только Самого Сына Божіего, Господа нашего Ісуса Хріста. Той Законъ Самъ исполнилъ.

Четвертая речь, которую маемъ ведати, естъ яко ся нашие дела подабати Богу могуть, понеже недостаточные. О том тако розумети маемъ, ижь хотя жь послушество нашое не естъ достаточно, але ижь мы верою в Сына Божіего угодни бываемъ Богу и Ему ся подобаемъ, прото и нашие дела любить, хотя жь недостаточные, але ижь особу Богъ любить, и дела любить. Опять, если которого человека не полюбить, тогды и делъ его полюбити никак не можеть. Яко Апостолъ къ Евреом пишеть: "Без веры невозможно угодити Богу" (Евр. 11). А на ином месте рече: "Все, еже не ест от вери, грех естъ" (Рим 14:23).

КОНЕЦЪ

Первое части КАТИХИС

Зьмест

Тытульны аркуш