КАТИХИСIСЪ
для детокъ хрiстианьских языка Руского коротко выложена

ПЫТАНЬЕ

Што есь ты?

ОТКАЗЪ

Человекъ есмь сътворенье Божие розумъное, Богомъ по образу Его сътворенное.

ПЫТАНЬЕ

Чого деля Господь Богъ тебе сътворилъ?

ОТКАЗЪ

Не для того, абы безъ мене быти не могъ, але абыхъ Его позналъ, любилъ, Ему Самому служилъ, а потомъ съ Нимъ на веки жилъ.

ПЫТАНЬЕ

Которое веры еси ты?

ОТКАЗЪ

Хрістианьское веры.

ПЫТАНЬЕ

По чому ты еси Христианинъ?

ОТКАЗЪ

По тому, яко въ Хріста верую и крестилъся есмь въ имя Его.

ПЫТАНЬЕ

Што виненъ оумети Хрістіанинъ?

ОТКАЗЪ

Чотыри речи умети и водле того жити маеть. Первая - законъ або заповеди. Другая - вызнанье веры. Третая - молитва Господня, четверътая - Тайны Хрістовы.

ПЫТАНЬЕ

Колько ест заповедей Божіихъ?

ОТКАЗЪ

Десять, и для того е зовуть Десятословиемъ, по гречески Декалогосъ.

ПЫТАНЬЕ

Говори десятеро Божие приказанье.

ОТКАЗЪ

Тако пишеть Моисей въ второй книзе, которую Исходомъ зовоуть: "Рече Господь Богъ вся слова сия: Я есмъ Господь Богъ твой, который тебе вывелъ изъ земли Египетъские изъ дому неволи. Не будешь мети боговъ чужіихъ передо Мъною (1).

Не учинишь собе образа, ни всякого оуподобиа, которое на небесехъ высоко, ани которое на земли низъко, ани которое въ водахъ подъ землею. Не поклонишься имъ, ани имъ послужишь. Я бо есмь Господь Богъ Твой силенъ, ревнивъ, который отдаю грехы отець на дети до третего и четвертого роду, которыи ненавидять Мене, а чиню милость надъ тисечми, которыи Мене любять и заповеди Моих стерегоуть (2).

Не возмешь имени Господа Бога твоего вътшче. Бо не пустить Господь оного безъ каранья, который бы взялъ имя Его на прасно (3).

Помъни день соуботный святити, шесть дни делати будешь, и всякие дела твоя оучинишь, а седъмого дня соубота естъ Господа Бога твоего. Не оучинишь ни какова дела ни ты, ни сынъ твой, ни дочька твоя, ни паробок твой, ни неволница твоя, ни скотъ твой, ни пришлецъ, который межи воротъ твоихъ. Бо въ шести днии сътворилъ Богъ небо и землю, море и вся, што въ нихъ, и отпочиноулъ Богъ въ седмый день. Сего деля Господь день соуботный благославилъ и посвятилъ его (4).

Чти отца твоего и матку твою, абы есь долго жилъ на земли, которую Господь Богъ твой дасть тобе (5).

Не оубий (6).

Не чужоложи (7).

Не кради (8).

Не посведчишь на ближного твоего сведества лживого (9).

Не похочешь дому ближного твоего, не похочешь жены ближного твоего, ни паробка его, ни осла его, ани чого колве, што естъ ближного твоего (10).

ПЫТАНЬЕ

Для чого Господь Бог далъ закон или заповеди Свои?

ОТКАЗЪ

Абы кажный ведалъ, што естъ грехъ, а што доброе дело. Тако бо Апостолъ пишеть: "Греха не разумехъ, точію закономъ" (Рим. 7:7). А на иномъ месте рече: "Закономъ познанье греха" (Рим. 3:20).

ПЫТАНЬЕ

На колько частей делиться десятеро приказанье?

ОТКАЗЪ

На две части Самъ Господь розделилъ заповеди Свои. Бо чотыри заповеди далъ на первой дошчце каменной. А шесть -- на дроугой дошчце.

ПЫТАНЬЕ

Для чого такъ розделилъ Богъ заповеди Свои?

ОТКАЗЪ

Того для, абы есьмо по тому знали, што есьмо Богу, а што ближному повинни. Бо насъ первая дошчъка тому навчаеть, яко ся къ Богу заховати маемъ. Другая пакъ указуеть, яко ближного любити потреба.

ПЫТАНЬЕ

Говори первоую заповедь.

ОТКАЗЪ

"Не будешь мети боговъ чужихъ предо Мною."

ПЫТАНЬЕ

Чого потреба къ вырозуменью тое заповеди?

ОТКАЗЪ

Хто хочеть заповеди Божіе достаточьне вырозумети, надобе ему чотыри речи паметовати. Первая речь, -- што Богъ чинити велить. Другая - чого заказуеть. Третяя - яко тыхъ караеть, которыи Ему непослушнии. Четвертая речь, яко оныхъ любить, которыи заповедей Его остерегають. То естъ, при каждой заповеди знадобе паметати тые чотыри речи: добрые дела, грехи, казьни и обетницы.

ПЫТАНЬЕ

Яко маю тое розумети: "Не будешь мети боговъ чужихъ"? Чи ли много ест боговъ?

ОТКАЗЪ

Богов нетъ многих, развей одинъ Богъ, которому бы вси служити и на Него ся надевати мели. Нижли люди, опустивши Бога, на иншие ся речи надевають, а тако собе многие боги на сердцахъ своих чинять. Бо у чомъ кто надежю маеть, тое Богъ его естъ. Яко естъли кто надеваеться на маетъности, вже е собе на месте Божимъ поставилъ. Прото Апостолъ лихоимяніе або лакомство ідолослуженіемъ, а лихоимца - ідолослужителемъ називаеть (Эфэс. 4:25-31, Эфэс. 5:1-8).

Потомоу жь и о иныхъ розоумей. Яко кто бы ся на свою силу надевалъ або на што инъшого. Тако жь она речь естъ чужій Богъ, для которое кто правдивого Бога опоушчаеть. Для того Апостолъ на противъ лживым учителемъ пишючы (Филип. 3:19), чрево ихъ богомъ называеть. Бо они только для чрева урядъ учительский на себе брали, а не для Божией славы.

ПЫТАНЬЕ

Скажи ми, чого по насъ Богъ хочеть у томъ слове перъвом, або которые суть добрые дела того слова?

ОТКАЗЪ

Тые соуть добрие дела, которихъ по насъ Господь Богъ хочеть у той заповеди. Напервей абы есьмо только Его Самого за Бога мели, въ Него веровали, упованiе и надежю покладали. Потомъ Его ся бояли, любили, взывали, Ему ся кланели. На остатокъ для Него абы есьмо вси речи, если бы к тому пришло, ради опушчали.

ПЫТАНЬЕ

Которые соуть дела противу тому приказанью, которихъ Богъ заказуеть?

ОТКАЗЪ

Много ест греховъ напротиву тому первому слову, але наболей тые, которые соуть напротивъ веры и страха Божіего.

Яко первый грехъ нечестивыхъ епикуреи, то естъ оныхъ, которыи не верують, абы Богъ былъ, або бы ся нами опекалъ.

Другый грехъ идолослужителей, то естъ которыи або много боговъ быти верують, або створенiю яко створителю слоужать, яко было у старіхъ еллинъ, которыи людей славныхъ по смерти за боги мели и оным ся молили. Яко Диаермiю, Аполлона и иных. Опять теперь у томъ же блуде суть, который ся святымъ вже усопшимъ молять.

Третіий грехъ естъ жидовъ и всих Бусоурманъ, которыи не такъ о Бозе розумеють и не такъ Его исповедують, яко Онъ Самъ велелъ, але яко они собе вымышлили. Тое жь розумей о еретикахъ.

Четвертый грехъ волхвовъ, то естъ чародейниковъ, которыи бесомъ верують.

Пятый - оныхъ, которыи Бога къ певнымъ местомъ яко бы привязують, домнемаючи, абы бордзей на одномъ месте выслухалъ, нежели на другомъ. Прошчами тое зовуть. Лечь противъ тому мнеманью пророкь Ісаіа пишеть, поведаючі, иже Богъ везде заровно человека, который ся каеть, слышить (Ісаіа 66). Сице бо рече: "Тако глаголеть Господь: небо - престолъ Мой, а земля - подножье ногама Моима (Деа 17), кый храмъ съградите Мне? или кое место покоя Моего? Все бо сътвори рука Моя, и се ест все Мое, глаголеть Господь. И на кого възрю, но на смиренаго и млъчаливого и трясушчаагося словесъ Моихъ".

Шестый грехъ противъ первому слову Божіему естъ лицемереи, которыи ся о правды Бога и Его суда не боять. Тежь которыи болей богатества и телесные сласти любять, нежели Бога, а предъся пред людми указуються побожными.

Седмый грехъ - не уповати на Бога а гневатися на Него, яковъ былъ царь Ізраилъский Саоулъ.

Осьмый - розумети велми высоко о своей правде, або справедливости. Яко онъ фарісей, который у молитве правду свою вычиталъ пред Богомъ сими словы: "Боже, хвалу Тобе вздаю, яко несмъ яко прочіі человеци, неправедници -- хишчници, прелюбодеи или яко сей мытарь, пошчуся двойчи на суботу" (Лука 18:11-12). Таковыи лицемерыи совито грешять. Наперед, иже не праве розумеють, што естъ судъ Божій, и для тое причины не от правды ся Бога боять. Надъ то службу Божiю собе приписують. Прото Хрістос Своихъ тако учить: "Егда сътворите повеленнаа вамъ, глаголите: яко рабы неключими або не потребны есмы, им же долъжни бехомъ, створихомъ" (Лука 17:10).

Девятый грехъ - сомънитися а не доверяти благодати Божіей, але помышляти, яко бы Богъ о насъ не дбалъ и отпустити намъ греховъ не хотелъ. Таковъ былъ Каин, который верити не хотелъ, абы ему Богъ отпустити мелъ, иже брата своего убилъ (Быт. 4). Тое жь и о Iуде, который Хрiста продалъ, розумети маешь (Мат. 27).

Десятый грехъ - не терпети а непрiимати завдячьне, што Бог допушчаеть, або Богу неправду и немилость приписовати.

Одинадцатый грехъ - не дбати о Божiе Слово, або ся его откинути або къ воли людемъ, або для страха, яко Петрь учинилъ.

Дванадцатый - уповати на свою силу, мудрость або на иного што. Яко Сеннахирим, на свою силу уфаючи, хотелъ вывернути царество Iудейское (Iсаіа 36).

ПЫТАНЬЕ

Скажи, яко Богъ караеть, кто грешить напротивъ первому слову?

ОТКАЗЪ

Напервей караеть Бог помстою духовною. Яко Апостолъ пишеть, иже iдолослужителие Царствія Божiя не наследять (Гал. 5:21). Караеть теже и зде Богъ iдолослуженiе голодомъ, войнами, моровымъ поветриемъ, полоненьемъ и иншими таковыми язвами. Яко у Старимъ Законе людъ Iзраилъский часто каралъ Богъ ни для чого только для того, иже Его опушчали, а чужимъ богомъ служили.

И ныне всех хрiстианъ скаралъ, некоторих слепотою, иншихъ неволею подъ Турецскимъ або подъ Антихрiстомъ Римскимъ. А мусить так быти. Бо тако Богъ обецалъ, даючи Свое приказанье, где рече: "Я есмъ Господь Богъ твой крепокъ и ревнивъ, отдаваючи безакониа отцевъ на чада до третиего и до четвертого роду ненавидяшчимъ Мене".

ПЫТАНЬЕ

Што Богъ обецуеть темъ, которыи тоее заповеди остерегають?

ОТКАЗЪ

Яко на незбожных двоя помста, потому же и тым, которыи заповедей стерегуть, двоя маеть быти заплата: одна -- вечная, а другая дочасная. О вечной Хрістос тако рече: "Ашче хочешь внити въ животъ, заховай заповеди" (Мат. 19:17). А зде по тому жь рече: "Чиню милосерьдие надъ многими тисечьми любяшчими Мя и храняшчими заповеди Моя".

Милосерьдие чинить Богъ над нами, коли намъ грехи отпушчаеть, а изъ грешныхъ праведъными чинить, абы есмо достойны вечного живота были. А тые речи соуть вечные заплаты. Лечь над то и на симъ свете таковых Богъ не опушчаеть, которыи Его приказанья стерегуть, Ему Самому служать, яко, наприкладъ, Даніилъ, Іереміа и инъшихъ много.