КАТИХИСIСЪ
для детокъ хрiстианьских языка Руского коротко выложена

ПЫТАНЬЕ

Говори третее приказанье.

ОТКАЗЪ

"Не возмешь имени Господа Бога твоего вотшче або напрасно."

ПЫТАНЬЕ

Яко тое маю розумети?

ОТКАЗЪ

Яко у первом слове далъ намъ Богъ науку, якое маеть быти нашое сердце, а въ второмъ слове, яко и теломъ Ему Самому служити вси повинни, тако у томъ третиемъ слове навчаеть насъ, яко языка своего маемъ къ чти Его вживати. То естъ, абы есмо под заслоною имени Божіего нашое славы, пожитку и иныхъ таковых речей не искали. А Его Самого абы есмо славили, взывали и благодарили.

ПЫТАНЬЕ

Которые суть добрые дела того приказанья, которые чинити маемъ?

ОТКАЗЪ

Напервей естъ взывание, другое - благодареніе или дякованье. Третее - выславленіе. Четвертое - исповеданіе. Пятое - навчаніе правды. Шостое - клятвы або присягы захованье. Тые суть добрие дела третиего слова.

ПЫТАНЬЕ

Яко маемъ Бога възывати?

ОТКАЗЪ

Взывати Бога никто не можеть естъли бы первей не позналъ Сына Его, иже естъ единый ходотай нашъ Богу Отцу. Бо егда человекъ хочеть призывати Бога, за того жь ему на память приходить недостойность его, а совесть или сумненье, знаючи до себе грехи, не смееть уповати на Бога, и того для Его не призываеть.

Прото потреба ведати, иже до насъ Богъ ласкавъ и милостивъ Христа деля, и для Него грехи отпушчаеть и молитвы наши слышить. Той бо естъ нашъ единый ерей, который з насъ недостойныхъ чинить достойными и Богу любыми.

ПЫТАНЬЕ

Которые суть дела противу тому приказанью Божіему?

ОТКАЗЪ

Напервей - не призывати Бога часу потребы и не благодарити Его.(1).

Призывати на помочь святыхъ вже усопъшихъ и оныхъ ходотаими чинити предъ Богомъ.(2).

Ложное ученіе сеяти и того боронити, а правое учение гудити, хулити и затирати.(3).

Непобожные службы Богу собою постановляти или от иного кого вымышленые держати.(4).

Правого ученіа не исповедати, наболей въ время гонениа.(5).

Евангелиа святого не учити, кто бы на тое избранъ.(6).

Часу незгоды въ Церкъви правды не съзнати, естли бы на кого залежало.(7).

Тежь всякіе хулы на Бога суть противу того приказанья.(8). Яко естъ слова Епикуреи, ими же нечестивіи осмевають Бога и Слово Его за басьни осужають. Тежь ругания противу Бога, яко слова фараона, Равсака и фарісей на Христа и на Его Апостолы (Выхад 5, 4 карал. 18, Мтв. 12, Ян 12).

Ешче слова, которими розслабляется вера в немошчных и меншееть Божіа слава.(9).

Тежь и они тяжко грешать, которыи словъ Божественныхъ от Писма Нового или Ветхого Завета ко блазеньству вживають.(10).

Тежь чародейници и чародейнице, ведьмы и ворожбиты противу того слова грешать, хотя жь пакъ часомъ на ихъ шептанье люди и скотъ здоровы бывають.(11).

Ешче противу того приказанья суть кривые клятвы або присяги. Бо таковый человекъ именемъ Божіемъ покриваеть грехи свои.(12). А к тому поневажь, кто кленеться сведъкомъ собе призываеть Бога, прото будеть ли клятися криво, обидить славу Божію, бо хочеть, абы Бог его неправде посведъчилъ. А ешче кроме того, кто ся криво кленеть, за малую речь судъ Божій собе маеть. Бо кленется, абы его Богъ скаралъ, естъли бы неправду говорилъ, а самъ ведаетъ, иже неправду кажеть, а предся гневу Божіего на себе призываеть, а потому знати, иже его ничимъ ставить. Бо естли бы ся гнева Божіего боялъ, ино бы его противу себе не призывалъ. Прото, иже такъ много греховъ естъ въ кривой клятве, повиненъ каждый стеречи себе пилъно, абы клятвамъ не повыкалъ.

На остатокъ противу тому третиему слову суть злореченья и проклианья.(13). Бо кто проклинаеть, призываеть Бога противу Его приказанья, абы человека скаралъ, которого Богъ любити велелъ. Яко той грехъ есть великъ, обачишь, естли и гараздъ вырозумеешь, иже не можеть быти самъ одинъ, але и иные грехи с собою тягнеть.

Напервей, кто проклинаеть, не маеть въ учтивости Бога, бо поменити Бога естъ Его призывати. Богъ пакъ маеть быти съ страхомъ и з великою учтивостию призыванъ. Лечь проклинанья бывають ляда с причины, часомъ напрасно, часомъ и зъ гневу, безъ страха Божія и учтивости Его. Надъ то, не маеть Бога никто призывати, абы кому шкодилъ, а кто проклинаеть, для того Бога въспоминаеть, абы зашкодилъ оному, кого злоречить. Лечь Богъ всехъ любити велелъ. Пророки ачь неколи проклинають и злоречать, но только хульником и нечистивымъ, иже истинное ученіе и правдивую службу непрестанно гонили. Лечь мы такового проклинанья в обычай брати не маемъ.

Кто бы тежь кому своимъ житиемъ або норовы взоръ къ злому подалъ, або от веры правой отвелъ, той противу тому второму слову грешить.

ПЫТАНЬЕ

Годить ли ся человеку хрiстианьскому присягати, чи ли не?

ОТКАЗЪ

Вже есм поведелъ, иже ся того каждый стеречи маеть, абы клятися не привыкал, але естли бы шло о славу Божію, маеть хрістианинъ клятися именемъ Божием.

Яко учинилъ Апостолъ Павелъ, который въ второмъ посланью къ Коринфомъ кленется тако: "Сведетеля нарицаю Бога на душю мою" (2 Кар. 1:23). По тому жь и Авраамъ клялъся пред царемъ Содомскимъ, иже не мелъ взяти ничого з маетности его, которую былъ отнялъ, побивши пяти царей, которыи завоевали были Содомъ (Роду 14). Ешче тежь годиться присягнути христианину, которому бы у праве о великую речь присягу присужоно, яко Апостолъ къ Евреомъ пишеть (6:16), иже всякому прекословію конецъ клятва. Лечь тое для малыхъ речей быти не маеть.

ПЫТАНЬЕ

Если ся годить присегати Хрістианину, для чого жь Самъ Хрістос заказуеть клястися и небомъ, и землею, и Іеросолимомъ?

ОТКАЗЪ

Не только в тыхъ словехъ Хрістовыхъ, где клятися заказуеть, множество людей, ачь пакъ и учоныхъ, омыляеться, але и всее оное речы, которую Хрістос на горе о Законе учинилъ, не розумеють. Бо вси посполите тако оную речъ толъкуют, якобы Хрістос ветхаго Закона заповеди на сторону откладалъ, а Свои новые заповеди законилъ.

Лечь Хрістос противу тому домниманью вельми ясне там же поведелъ, иже не пришолъ разорити Закона (Мтв. 5:17). Часто теже мовилъ, иже съ Отцомъ едино ест (Ян 10:30). А о Своей науце поведелъ тако: "Мое оученіе нестъ Мое, но пославшего Мя" (Ян 7:16). С которых слов велми явна речь, иже Хрістос ани отставлялъ, ани отменялъ Закона Божіего, але только противу лживымъ толковником вырозуменье правое указалъ. Прото жь кто бы такъ розумелъ о Хрісте, яко бы всякой клятвы боронил, где поведелъ не клятися отнюд, чинилъ бы таковый Сына Божіего Отцу противного, чого и помышляти Боже не дай. А яко бо Хрістос едино съ Отцом будеть, естли бы оные заповеди отнялъ, которые Богъ предалъ? Закон Божій тако о клятве пишеть: "Господа Бога своего бойся и Тому единому да служиши, и именемъ ся Его да кленеши" (Другі Зак. 6). А Хрістос рече: "Не пріидох розорити Закона", ино каждый вже розумети можеть, иже клятва, если бы для Божіей славы, або помочи ближного, або очишченья себе, ест речь слушнаа, только бы справедливаа.

А ижь Хрістос клятвы не допушчаеть, для тое причины тако учинилъ, иже на онъ часъ жидове повыкли были клятвамъ на некоторые створенья, за грех того не маючы, бо только кривую клятву за грехъ мели. То пакъ Хрістос указуеть, иже не одно несправедливаа клятва на Бога, але и справедливаа, хотя на створеные речи, если бы не потребнаа, ест грехъ пред Богомъ. А не ест тое слово Хрістово противу Закона Божіего, бо и Законъ у томъ третиемъ слове того жь боронить, где рече: "Не возмешь имени Господа Бога твоего", але прикладаеть "вотшче", абы кто клятвы въ малую речь не ставилъ.

А такъ годиться Хрістианину, естли бы иначей быти не могло, клятвы, або яко тепер зовутъ, присягы вживати, яко для славы Божіей, тако естли бы у праве слушне была сказана. Для славы Божіей присягнулъ Авраамъ, Павелъ и иншіи. А о той, которую право судить, въ Исходе тако написано: "Ашче кто дасть другу сребро или съсуд заховати, и оукрадеть ся из дому мужа того, и обряшчеть ся украдый, да тяжыт сгубъ, ашче ли не обряшчеться тать, да придеть господин дому пред судьи, и да ся кленеть, яко самъ не скористовалъ" (Разьдзел 22). Ту явне видишь, яко не только Богъ клятися допушчаеть, але часу потребы и повелеваеть.

ПЫТАНЬЕ

На чие имя маеть быти присяга?

ОТКАЗЪ

Вошло было теперешнего веку в обычай людемъ, ижь не только именемъ Самого Бога, але тежь именемъ пречистой Сына Божiего матки и иных святыхъ клялися, лечь той обычай не только естъ злый, але и нечестивый. Ест бо клятва призыванье Самого Бога на сведительство, яко Который вси речи ведаеть (Ісая 2:63). Лечь поневаж святій не ведають, што ся с нами дееть, для того не ест речь пристойнаа призывати оных на сведетство. К тому, клятва естъ служба або поклон Богу, естли ест справедливаа. Служба пакъ Божіа ест Его слава. Прото кто на святыхъ присягаеть, тотъ славу Божію от Бога отбераеть и оную святымъ, то ест, твари, отдаеть. Противу чому Самъ Богъ у пророка Ісаіи тако рече: "Славы Моея иному не дам, ни добродетели Моея истуканнымъ" (Ісая 42). А тако, не маеть никто иначей присягати, только на имя Божіе. Яко написано: "Господа Бога твоего бойся и Тому единому да служиши, и именем ся Его да кленеши" (Вторый За 6).

ПЫТАНЬЕ

Што маеть пред собою мети человекъ, коли присягаеть? Бо некоторие мевають образ, на который руку кладуть або и целують.

ОТКАЗЪ

Ачь тотъ былъ обычай сих теперешных часов, иже кто присягалъ, клалъ руку на образъ, а потомъ и целовалъ, нижели мы, христиане, не повинни есмо оных обычаевъ держати, которие соуть противу слову Божіему или противу обычаем угодниковъ Божіихъ. Прото и въ присяганью мають христиане той обычай заховати, который або Самъ Богъ указалъ, або святіи заховали.

То пакъ Святое Писмо клятву або присягу Самого Бога або коего святого выписуючи, часто воздвиженіе рукъ припоминаеть, а часомъ клятву возъдвиженіемъ рукъ зоветь. Яко у Езекіила Богъ рече: "Глаголахъ к дому Ізраилеву в пустыни, разлиати ярость Свою на ня в пустыни, яко потребити я, и сътворих, яко жь паче всего, да ся имя Мое не осквернит пред странами, изъ них же изведох я пред очима ихъ. Того деля воздвигох руку Мою на ня в пустыни, да бых не въвелъ ихъ до земли, ю же дах имъ" (Езекі 20).

Што рече: "Въздвигох руку Мою на ня", тако ся розумееть, яко бы реклъ: "Заклялъся есмъ". По тому жь в песни Моисееве Бог рече: "Воздвигну на небо руку Мою и кленуся десницею Моею". Зде значится, иже клянушчiися мели тотъ обычай подняти въ небо руку. Тако Авраамъ клялъся царю Содомъскому. Бо егда у него царь просилъ людей, а иные вси речи, которые былъ от чотырехъ Царей отнялъ, взяти ему велелъ, Авраамъ рече: "Воздвигаю руку мою къ Господу Богу вышному, владеюшчему небомъ и землею, яко не возму". Где говорить: "Воздвигаю руку мою", тако ся розуметь, яко бы реклъ: "Кленуся".

А к тому с тых словъ значиться, иже кто ся клялъ, руку в небо взносилъ. А не толико таков взор у Старомъ Завете ест описанъ, но и въ Откровенью святого Іоанна о томъ обычаю тако написано: "Ангелъ, его же видех стояшча на морю и на земли, воздвиже руку свою къ небу и клял ся живомъ въ веки векомъ (Поясну жь и у Дані 12).

Обачи жь а паметоуй обычай, который Святое Писмо и Нового и Старого Завета похваляеть. Не знайдешь бо ни на одномъ месте, абы на образы, або на што иного кленушчiися руки клали, але е въ небо возносили. Прото и тепер не годиться иных обычаевъ вымышляти.

ПЫТАНЬЕ

Што о томъ розумеешь, естлибы кто присягнулъ што учинити, а потомъ бы обачилъ, иже онаа речь естъ противу Слова Божіего, маеть ли той для присягы оную речь деломъ исполнити, чи ли не маеть?

ОТКАЗЪ

Кто з необаченья або и нарокомъ обецуеть што неслушного учинити, а потом ся каеть и не чинить, хотя молбою обецалъ, той единою только согрешилъ. Лечь кто для слюбу або клятвы, боячися ее нарюшити, противу Закона чинить, того согрешенье не ест просто, але вже двояко. Бо ачь написано: "Помолитеся и воздадите Господеви" (Псалм 75), але тое розумети маемъ о побожныхъ молитвахъ, а не о безбожныхъ. О сихъ бо на иномъ месте тако пишетъ: "Богъ не хотяй безакониа ты еси" (Псалом 5). Безаконие естъ всякаа речь, которую противу Закона Божiа чинишь, того, кажеть, Богъ не хочеть. А иже безакониа Богъ не хочеть, чого деля ты безаконие чинити маешь? На взорь маемъ Ирода царя, который клялъся Иродиадиной дочце дати о што бы просила (Матф. 14:7), а егда, научена от от матки, просила головы святого Предтечи и Крестителя Іоанна (Марк. 6:24), прошю, што мелъ учинити Иродъ? Мелъ ли клятве досытъ чинити? Домнимаю, яко нетъ того, кто бы не бачилъ, иже лепшей было Ироду не одну клятву, але и колько их зрушити, нежели святому человеку одну якую кривду учинити, не только животъ отняти. Прото и теперь всякой клятвы нечестивой не маеть никто выполъняти, але того сердечьне жаловати, хочетъ ли въ следъ Ирода не ити.

За нечестивые пакъ клятвы оные почитати маемъ, которие суть або противу Божіа славы, або своего спасеніа, або ближного любви.

ПЫТАНЬЕ

Яко деръжишь о иноцехъ или о девственицехъ, которые молбою обешчають девъство ховати даже къ смерти?

ОТКАЗЪ

О девстве не годится зле розумети, понеже Апостолъ пишетъ, яко добро человеку жене не прикоснутися, и к тому рече: "Мню сее", - разумей девство, - "потребно быти за настояшчую нужду" (1 Кор. 7:25-26). И Самъ Христос похваляеть каженики, иже сами себе казять Царствія Небеснаго ради (Мат. 19:12). А таков былъ Иліа, Іоаннъ и прочіи.

Лечь ся надобе стеречи, абы есмо теперешных Иноковъ Мниховъ и всехъ, которые чорною ризою девство показують, з оными давными не ровнали. Бо въ иншый обычай перви они девицами были, нежели теперешніи. Сихъ бо держяться великие блуды, наболей три. Первый блудъ их ест, иже в томъ девстве не хотять жити тако свободне, але аже ся молбою обешчавши. Того нигде Хрістос не повелелъ. Іоаннъ у девстве жилъ, але ся о немъ не пишеть, абы тое за мольбою чинилъ, по тому же Иліа. Апостолъ много пишеть о девахъ и юношах, але негде жь имъ не повелеваеть обешчатися на весь живот тако жити, но паче ясне пишеть, иже можеть дева замужь ити, а не съгрешить. Тако бо рече: "Ашче посагнеть дева, не съгрешила естъ". Лечь теперешніи девственники тако розумеють, иже кто бы от них, молбу отставивши, бракъ принялъ, той Іуды предателя горшый ест. Но боятися имъ потреба, абы не от оныхъ числа были, о которых къ Тімофею тако Апостолъ пишеть: "Духъ же речію глаголеть, яко въ последныя времена отступять неціи от веры, вънимаюшче доухом льстивым и ученіем бесовским, въ лицемеріи ложъ говоряшчим, соженомъ своею съвестію, възбранеюшчимъ женитися, и свенитися брашенъ, яже Богъ создана снеденіе съ благодареніемъ вернымъ и познавшіимъ истину".

Возри пилно в тые слова Святого Духа, а обачишь, о комъ ся розумеють. Явне бо оных отступники зоветь, которыи возбраняють женитися, тое пакъ возбраненіе ученіем бесовскымъ нарицаеть. Едали ся тое межи теперешныхъ девственниковъ не найдуеть? Прото потреба ся таковых остерегати, яко и Апостолъ повелеваеть, тако къ Коласаем пишучи: "Никоторыи же вас да не бес правды даеть, хотя смиреномудріемъ и въ службе аггельстей, яже не виде оуча" и прочая. Зде остерегаеть Апостолъ Коласаевъ, абы ся прельстити не дали, ани смиреномудріемъ или покорою, ани службою аггельскою, то естъ девствомъ. Яко и теперь черънество ангельскимъ образомъ зовуть.

Не много о томъ говорячи, стережися каждый тое сети, у которой діаболъ многих половилъ. Добраа речь ест девство, кому бы той даръ Богъ милостивый далъ, але не надобе его обешчати, но свободне в нимъ Богу служити, яко есмъ на взорь указалъ Іоанна крестителя. Той не обецуючи девъство заховалъ. Естъ бо велико небеспеченьство обешчати Богу, наболей чого кто не маеть въ своей власти. Не иначей тіи чинять, они же девство Богу обецують, але ровне яко естъли бы кто клялъся николи не спати або не ести. А што бы тое было, хыба кусити Бога? Чого намъ Самъ Богъ заказуеть, мовячи: "Не исъкусиши Господа Бога твоего" (Втор. Закон 6). Искушаешь каждый Бога, кто ся над Его приказанье и над свою силу чого догадываеть а на себе кладеть. Яко тые нинешніи девъственици чинять, забывши, што Давыд рече: "Волею пожру тобе"(Псалом 53), неволею пожрети Богу хотять.

За малое ся им видить доброволне пребывати у девъстве, аже мольбою тое овешчають. Але яко тое исполняють, не надобе выписовати, понеже вси о томъ ведають. Мне ся тако видить, иж бы не всемъ кривъду онъ учинилъ, кто бы оную речь Апостола Павла на них привелъ, которую о языцехъ къ Римляномъ пишеть тако: "Предасть их Богъ въ вся похоти сердца их, в нечистотоу, досажати в телесехь их в собе" и прочая.

Прото мнимаю, иже не омылилъся есм, назвавши таковыя обешчаніа сетью діавольскою, ею же многых вже половилъ и дотуле ловить. Напервей бо къ тому их приводить, абы обецали, а потом абы боячися обетницы отменити, въ всякой нечистоте жили, а того бы за грехъ не личили. А затым удвои способъ грешять. Наперед, иже девство обецують, которого имъ Богъ не далъ, ани обетовати велелъ, у другое пакъ грешять, яко обешчаніа своего не исполняють, но паче вместо девъства нечистоту творять. А не розумей абых тое собою говорилъ або вымыслилъ, бо ани бы ся того чинити годило, ани я самъ хочю. Лечь тое все от Божественного Писаніа пріимую.

Обачь бо, естъли не по тому жь и Апостолъ о девстве розумееть, ижь потреба ся стеречи, абы намъ не было силомъ або сетию (Рым. 7:35). Бо где выхваляеть не ожененіе, на концы приложилъ тако: "Се же к ползе вам глаголю, не да сило вамъ наложу". Припатрися тому, што Апостолъ рече, прошу тебе, пилно. Бо ачь не мовить просто: "Не обецуй девства", але ся тако розумееть. Нижли тако для того не рече, ижь ешче не было таковыхъ обетниць, яковые потомъ не борздо настали. Ачь былы обешчаніа или молбы, але по Закону, то естъ жидовъские, не хрістианьские. Того для Апостолъ або, радъней, Духъ Святый, не мольбою, ани обешчаніемъ, але силомъ назвалъ и рече: "К ползе вамъ глаголю, не да сило вамъ наложу". Яко бы тако написалъ: "Добра речь естъ девство, але маеть быти безъ сила", то естъ маетъ быти по доброй воли, не по молбе или обетованію. Прото и Христос не силою повелеваеть быти каженикомъ, але кто можеть. Тако бо рече: "Могый вместити, да въместить". Ныне же не потому каженици держять, але просто, хотя жь иный того дарю не маеть, предся овешчаеть, а потомъ, яко бы не обешчавши, живеть и в тое сило упадаеть, и естъли ся не покаеть, певъне мучонъ будеть. Бо ачь тому людие не верують, але Слово Божіе мимо ити не можеть, которое сведъчить, иже не пустить Господь оного безъ каранья, который бы взялъ имя Его напрасно. О томъ же Соломон пишеть, яко многымъ лепшей не обешчати, нежели, обешчавши, не исполнити (Екле 5). Але вже доволино о симъ блуде первомъ.

Другый есть не меншый, яко не у тотъ обычай девствують, у которыі бы мели, але иже ся для того живота вечного надевають. Если бы тое надежи о девъстве не имели, за того жь бы просторнейшие монастыри были, сами бы ся тольки они, имъ же Богъ чрево, зостали. Але обачмы, откуле тое мниманье взяли. Напервей приводять, што Хрістос о кажениках поведелъ, иже казять ся Царствіа Божіа ради. Которые слова такъ розумеють, яко бы Хрістос оных кажениковъ похвалялъ, которые ся казять для того, абы Царствіе Небесное взяли.

Лечь таковое розуменье естъ и шкодливое и ложъное. Не того ту Хрістос розумееть, ани тых кажениковъ похваляеть, которіе бы ся для того кажениками учинили, абы небо за тое зыскали, але ся тые слова тако розумеють, иже они каженици Царствіа Божіа деля казяться, которіе бы ради тому Царству служили и оное ширили. Царство Божіе розумей: Святое Евангелие или науку Хрістовую, для того Царства добрая речь быти каженикомъ. То естъ не брати жены, абы такъ готовшый былъ на всякое дело, которое бы тому Царствоу было полезно. Для того Іоанъ креститель, для того Иліа и прочіи казилися, то естъ безъ жонъ жили. Не для того, абы собе небо одержели. Иншое бо речы надобе къ одержанью неба, или вечного живота, нежели девства.

Але, недалеко речы отступуючи, девъство естъ даръ Божій вельми пожиточный, но не къ оправданію, яко мнихи домнимають, ани ко оставленію хрехомъ, но абы человекъ былъ волнейшый и готовъшый къ всякому доброму делу, яко есмь вже поведелъ. Посведчаеть ми того Апостолъ Павел, где о девстве тако къ Корінфяном советуеть: "Мню се", - розумей "девство", "добро быти за настояшчую нужу, яко добро человеку тако быти" (1 Кор. 7:25-26), то естъ безъ жены. Ясна речь, иже сими словы Апостолъ выхваляеть девство. Рече бо: "Добро человеку тако быти", але и тое явно, иже и причину кладеть, для которое девъство добро: "За настоящую, кажеть, нужу".

Пилно паметуй, иже не рече: "Грехом отпушченіа деля", або про вечьный животъ, але за настояшчую нужу, або яко по просту значней сказати можемо: "Про настояшчю потребу". Настояшчю потребою зоветь, которая вже яко бы над нами стоить, а за того жь пріходить, яко бы реклъ, для трудностей, которие над нами всегды стоять. Сами бо видимы, ижь жонатому далеко трудней бываеть, коли на него приходять гоненіе и всякие скорбы, или клопоты, нежели неженивому. Бо той от всего того свободенъ. Прото Апостолъ о жонатыхъ рече, яко скорбь плотію имети начнуть таковыи (1 Кор. 7:28). Опять, о нежонатыхъ там же пишеть, яко пекуться о речахъ Господнихъ. Тая ест мзда за девство, а не иная.

Третіи блудъ теперешных мниховъ естъ, яко о девъстве розумеють, абы оное предъ Богомъ достойнейшое за бракъ, або за женитву было. И того для оное слово Хрістово о семени падшемъ на добрую землю, (где мовить, яко обо приносить плод с торицею, обо шестидесятный, обо тридесятный) тако толкують, плод с торицею девствоу приписуючи а шестидесятный плод и тридцатый женитве (чти у толъковых Евангеліахъ слово 34). Лечъ ся на томъ велми омыляють. Не о девьстве бо тамо Христос притчю поведелъ, але о Слове Своимъ, даючи знати, яко не въ всехъ пожитку чинить. Аже если на добрую землю, то естъ на доброе сердце падеть, хотя жь онъ человекъ белецъ, хотя жь чернецъ, который, принявши таковое семя, чинить плод або пожитокъ о ономъ семени, то естъ о Божіимъ Слове. Бо таковый не только самъ станеться побожный, але и иных къ побожности потягнеть, на болей домъ свой. А иже одинъ большей притягаеть людей, нежели другый, для того Хрістос розные плоды положилъ.

Або и тако розумети можемь, коли кто тело свое мертвить, абы въ нимъ не было каменья, тернья и штокольвекъ семя Божественно давить, выкореняеть, тогды плод приносить. То пакъ не вси заровно такового тернія позбывають, але одинъ большей за другого, того для поведаеть Хрістос, яко ово семя сторычный плод чинить, ово шестдесятный, ово пакъ и тридесятный. Да вед же и тое знаменуй, яко Хрістос не земли плод приписуеть, але семеню. Бо не рече: "Добра земля принесе плод", але рече: "Семя, падшее на добрую землю, творить и приносить плод", абы кто собе не приписалъ, если у собе знайдеть што доброго, але абы ведалъ, яко всяко даяніе благо и всякъ даръ съверъшенъ съвыше ест, сходя от Отца светомъ, яко Іаковъ пишеть (Іак 1:17).

Прото блудять и в томъ иноци, яко домнимають, абы их девство вышшаа речь пред Богомъ была, нежели ожененіе. А если ся имъ тако видить, иже не блоудять, ино бы тое нехай Словом Божіимъ показали. Лечь они того не приняли от Слова Божіего, но от ума телесного. Пишеть убо Апостолъ Павелъ, яко ест рознаа речь дева а жена, але абы тая розница пред Богомъ место мела, далъ знати о васъ бес печали быти. Кто бы ся тако заховалъ, не завадила бы ему жона. Але нехай на том доволно будеть.

ПЫТАНЬЕ

Яко Богъ оных караеть, которие напротивъ тое заповеди чинять?

ОТКАЗЪ

В Законе Моисеевомъ велелъ былъ Богъ таковых каменьемъ оубивати. И тако учинили одному сынови жены Ізраильския, его же съ Египтяниномъ мела. Той бо сынъ, посварившися з другомъ, хулилъ имя Господне и повелелъ его Господь убити. А не только того одного, але и всем, которые бы ся того допустили, по тому жь чинити велелъ (Леув. 24).

Прото на урядъ належить, абы таковыхъ каралъ. А хотя жь пакъ уряд не скараеть, предся Самъ Богъ карати певне обецалъ. Бо тако к тому Слову придалъ: "Не очистить от греха Богъ того, который береть имя Господа Бога своего надармо".

А не розумей собе того только о клятве або о присязе, але и о всякомъ имени Божіего недостойномъ призыванью. К тому кто бы блюзнилъ или проклиналъ, не минеть его помста. Мусить таковъ каран быти и зде, на сим свете, и потомъ на оном, яко и сами на око видимы, иже ся никому не минаеть, кто бы Слово Божiе або имя Его гудилъ, або под нимъ не правду твердилъ.

О Рапсаце, царя Асирского воеводе, написано, яко имя Господа Бога смеле хулилъ, которого часу Iеросолимъ былъ облеглъ, але тое жь ночи окрутне скаранъ, тако иже одинъ ангелъ от оного войска убилъ сто тисечей и осмъдесятъ тисечей и пять тисечей мужей (4 Цар. 18,19). О Керинфе Еретице пишють, яко, заставши его Iоаннъ Богослов у отмывальни, а ведаючи, яко Сына Божiего хульникъ естъ, не хотелъ ся тамо мыти, но ко своимъ рече: "Бежемо вонъ, да не згинемо съ Керинфомъ, истине врагомъ" (Евсев, в треіихъ книгах глав. 28). И пишють, яко за того жь, егда вышолъ Iоаннъ, упала омывальня и убила Керинфа. Не лепшое мелъ доконанье потомъ Арiй, тежь Еретикъ, который противу Божеству Хрiстову блюзнилъ, того для доконанье Iудино принялъ.

ПЫТАНЬЕ

Што Богъ обецалъ тымъ, которие бы имени Его з верою а потребне призывали?

ОТКАЗЪ

Обецалъ таковых николи не отпустити, выслухати, ратовати, съ ними быти и всех бедъ избавити. О чомъ часто и въ псалмехъ Духъ Святый споминаеть. Яко въ псалме 49: "Призови Мя въ день печали твоей и збавлю тя". По тому жь в псалъме 144 написано, яко близъ ест Господь всемъ призываюшчимъ Его, всем призываюшчимъ Его въ истине.

И везде таковые обетницы у Святомъ Писмени знайдешь. А не только обетницы, але и скутекъ самый обачишь, яко Богъ на призыванье имени Своего великие чюда и сылы творилъ, а Своихъ верныхъ боронилъ и избавлялъ. Призывалъ Моисей - а розтупило ся море. Призывалъ Iсоусъ Навинъ - и стануло солнце. Призывалъ Самоиль - а голосъ былъ съ небес слышанъ. Призывалъ Илiа - а огонь спалъ из неба. И многие иншие речи опушчаю.

Далей

Зьмест

Тытульны аркуш