КАТИХИСIСЪ
для детокъ хрiстианьских языка Руского коротко выложена

ПЫТАНЬЕ

Говори шостое слово Божіих заповедей.

ОТКАЗЪ

Шостое слово естъ: "Не оубиеши".

ПЫТАНЬЕ

Яко ся тое слово розумееть?

ОТКАЗЪ

Тако ся розумееть, яко Сам Хрістос толкуеть, где рече: "Слышасте, яко речено бысть древніимъ: "Не убиеши, иже бо ашче оубиеть, повинен ест суду". Азъ же глаголю вам, яко всяк, гневаяйся на брата своего всуе, повинен естъ суду, а иже ашче речеть брату своему: "Рака", повинен естъ сънмишчу, а иже речеть: "Юроде", повинен естъ геенне огненей" (Мат 6:21-22).

От сих словъ Самого Господа латве вырозумети, иже убійство естъ, не только рукою або оружіем кого убити или только бити, але теже слово прикрое або сромотное на кого выговорити, або ся гневати, або кому завидети естъ убійство, которого у симъ слове Богъ заказуеть.

Бо если бы только рукою бити або шкодити ближному заповедалъ, ино бы только рукам далъ Богъ тую заповедь на тотъ обычай: "Не подоймешь, человече, рукъ твоихъ на ближного своего". Але не тако рече, но просто: "Не убиеши". Якобы тако реклъ: "Ты, человече, со всеми чувствы, члонками, похотями и страстьми твоими не оубиеши".

А тое естъ правое того слова вырозуменье, абы есмо ни жаднымъ обычаемъ здоровью душному и телесному ближному не шкодили, ани ему завидели, ани ся на него гневали, ани проклинали, але ему здоровья тако, яко собе, зычили.

ПЫТАНЬЕ

Которие суть добрие дела того шостого слова?

ОТКАЗЪ

Яко оубійство естъ розно - одно на души, а другое на теле, тако и дела добрие тое заповеди двоякие суть - духовные и телесные. Телеснаа реч есть не оубити на теле, не пособити биючому, не радити на убійство, боронити оных, которих бы кто кривдити хотелъ, часу голоду выховати або выживити, на воде або часу иншое пригоды ратовати - добрие суть дела, але телесные, которие и неверніи чинити могуть. Да вед же и таковыхъ делъ Богъ по насъ хочеть, абы людие промежку себе супокоем жили.

Опять, духовные дела залежать в Божіей боязни, в вере и в познанью Хріста чинити по сему слову. То есть не держати гневу на сердци своем, не мыслити о помсте, жаловати от правды обидимыхъ, хотети их боронити и онымъ пособити, латве отпушчати васьни або гневу не держати.

ПЫТАНЬЕ

Которие суть грехи противу шостого слова?

ОТКАЗЪ

Потому жь, яко добрие дела, и грехи: одны - внутреные, а иншие - зверховные. Зверховные грехи быти розумей не урадовне тело чие, како ли будеть, вередити. Пособляти или хвалити обиду або кривду. Не боронити их, же боронити маеть. Грешять теже нерозумные лекари, аптыкари и барбири, которіи, не знаючи, зелье або лекарство дають шкодливое. Грешать теже Цари, коли несправедливую войну зачинають.

Опять, внутреные грехи суть мети хуть на мысли своей зашкодити кому, теже възненавидети кого, зла ему зычити, не жаловати, миру межи людей не жадати, незгодам ся радовати и иные таковые.

ПЫТАНЬЕ

Грех ли естъ убити розбойника або иного которого злочинцу?

ОТКАЗЪ

Уряд от Бога на тое естъ избранъ, абы злых каралъ, а добрим покой чинилъ. Прото урядъ не грешить, коли злых караеть не только винами, битьем, але и смертію. Але кто бы, на враде не будучи, злочинцу убил, без греха быти не можеть. Бо не мает ся никто своих шкодъ або кривдъ сам мстити, ани собе меча братии, яко вышшей речено естъ.

У Моисея теже написано, яко Богъ рече: 2Мне отмшчение, и Азъ въздам" (Втор. Зак. 36). Тое жь и Апостолъ припоминаеть (Евр. 10:29). Которими словы Богъ заказуеть, абы ся никто своеи кривды не мстилъ, але Богу помсту заховалъ. А Богъ черезъ урядъ мститься, коли той злыхъ караеть.

ПЫТАНЬЕ

Ино хотя бы розбойникъ билъ, не отниматися ему?

ОТКАЗЪ

Урядники по Божіему росказанью повинни ся о том пилно старати, абы розбоевъ не было, яко вже речено. Да вед же если бы ся прігодило хрістианину, жебы на него розбойник прішолъ и хотелъ бы му живот взяти, ино маеть ся тогды потому заховати, яко ся святіи патриархи в таковых пригодах заховали. Яко о Іакове написано, ижь ся боронилъ ангелу, домнимаючи, абы разбойник (Бытя 36). У котором взоре две речи обачь: напервей, ижь патріархъ не ждалъ, аж бы его билъ розбоиникъ, яко и онъ розумелъ, бо бы тое было Бога искушати, але ся с ним взялъ и отпералъ ему, яко могъ. А другую речь обачь, яко Іаковъ не стоялъ на животъ розбойника, але только яко бы самого себе оборонилъ.

Прото и хрістианинъ мо можеть своего живота боронити, але на чужіи животъ не маеть стояти. Да вед же если ся кому за неволею а необаченьемъ пригодило такового непріятеля оубити, мовлю, боронячися, а не хотячи оубити, кто оубиеть, домнимаю, яко таковое оубійство от вряду не маеть быти карано. И пред Богом меншей таковый оубійца повиненъ, поневажь и под Законом обрал былъ Богъ певные места, на которие таковские втекали, они же нехотя убивали (Исход 22). А не только тое, но и явне написано, естли бы кто татя, вламываюшчагося в дом его в ночи, оубилъ, не винен крови его. А естли таков от крови татя, он же только маетности отнимаеть, слободенъ, далеко подобней оному бытии волному, кто розбойника, на пустом месте на животъ и на маетность восставшего, с пригоды оубилъ.

ПЫТАНЬЕ

Годить ли ся Хрістианом воевати або не? Бо о сих написано: "От Сіона изыйдеть закон, и Слово Господне из Іерусалима. И разсудить по среде языкъ, и обличить люди многы. И роскуют мечя своя на леметя, и копія своя на серпы. И не воздвигнут языкъ на языкъ меча, и не навыкнуть к тому воевати" (Ісаіа 2).

ОТКАЗЪ

Коли бы вси люди хрістиане истиніи былі, не было бы надобе ани судей, ани иных оурадніков. Бо правый Хрістианинъ маеть любов, которая, по Апостолу, не завидить, не пеняеть, не гордится, не злообразуется, не ишчеть своих речей, не дражнится, не вменяетъ злого, не радуется о неправде, радует же ся истине, все любить, все терпить (1Кор 13:4-7). Гледи жь, коли бы такови вси были, мовлю, се естъ, коли бы вси истинными а от правды Хрістианами были, а на што бы таковим судья? Темъ же образом и о войне розумей, а яко бы тіи воевати ся оумели, которіи ани завидують, ани злого за злое пріймаютъ, вси кривды терпят, вся любят. Наболей иже не было бы и кривды кому чинити, коли бы, мовлю, вси людие оучинили ся Хрістианами не поверху только, но от правды съ всего сердца.

Але понеже Хрістиане мусять всегда, докуле зде, на земли, будут, межи злых людей житии, яко добрие рибы посреды злых, по Хрістовей притчи (Мат. 13:47), того для и урадники, и воины у них быти мусять. Прото и Креститель святый Іоаннъ, коли его драбы, или людъ служебный, воспросили што бы чинити имели, не велелъ, абы службу военскую покинули, але абы войну служачи, сие три речи заховали: никого не обидели, ни оклеветали а доволни были оброки своеми (Лука 9:14).

Да вед же не кажное войны Хрістианинъ служити можетъ. Бо часом война бываеть несправедливаа. Яко коли Тыраннъ или мучитель какый гордый, не переставаючи на своем паньстве, чужие городы, князтва или земли силою забираеть. Таковое войны служити Хрістианину не годиться. Бо таковая война естъ разбой. А кто бы тамо человека, хотя жь не Хрістианина, оубилъ, вередилъ або обидилъ, той противу шестому слову Божіему оубійство пополнилъ. Мучитель, пакъ иже безвинне брань зачинаеть, только оубійствъ долъженъ пред Богом, колько тамо головъ ляжеть.

Опять, справедливаа война естъ, коли не для гордости, не для лакомъства, але для обороны пределовъ своих Король или Княз оружие противу врагом своим береть, отпераючи имъ, абы подданыхъ его не мордовали, не вязали, в полонъ не гнали, женамъ и девицамъ насилиа не чинили, церкви не потребили, детей не споганили або не побили, градов не спустошили, оучителей не розгонили и всякого чину доброго не помешали. С тых причинъ а на таковых людей слушнаа бываеть воина, можеть ее Хрістианинъ з доброю совестию служити.

Сее пакъ пророчество не стоить противу тому, ани отнимаеть Хрістианомъ оружіе еже на врагы, але о любви кажеть, которую промежку себе мети должни, яко есмъ вже изъ Апостола пріводилъ. К тому ознамуеть Ісаіа пожитокъ науки Евангельское, котораа от Сіона изыти мела, иже которіи ее пріимуть, оупокоини а чиши быти мають.

ПЫТАНЬЕ

Яко Богъ караеть они же непослушни сего шостого слова?

ОТКАЗЪ

Напервый оубійца былъ Каинъ, который ачь ешче до сее Божіей заповеди брата убилъ, предъся у великій гневъ Божій для того оупалъ, бо и от отца отлучилъ, и от всехъ побожных потомков его, и знамя на него възложилъ, абы ся его вси остерегали а с нимъ не обшчовали. Але потом тяжъшую муку оубійцом Самъ Богъ после потопа придалъ, тако къ Ноеви рекучи: "Кто излиеть кровь человека, и излиется человеком кровъ его" (Бытя 9).

По образу Божіему создан естъ человекъ. Потому жь и в Законе поновилъ Богъ тую муку. А хотя жь часомъ злый урядъ не караеть оубіицовъ або для посуловъ, або иного чого, предъся Самъ Богъ караеть и оубійцевъ, и дружину ихъ, сиречь, оурядъ. Не можеть бо того не каравши спустити. Яко къ Каину Самъ рече: "Что сътворилъ еси, се глас крови брата твоего вопиет ко Мне от земли".

Іерусалимъ, такъ славный город и называемый святый, о тое Богъ скаралъ, яко оубійство в немъ пановало. Яко Хрістос Сам поведелъ: "Іерусалимъ, Іерусалимъ, избивы пророкы каменіем, побивая посланыя къ нему, коль крать въсхотех собрати чяда твоя, яко же събираеть кокошь птенця своя подъ криле, и не въсхотесте? Се оставляетъся вамъ домъ вашь пустъ" и прочаа.

Потому жь и на Вавилон у Авакума Богъ рече: "Понеже ты пленилъ страны многы и пленять тя вси оставшіися людие, крове деля человечя" (Авак 2). Давыд теже написалъ, яко мужи крови и льстиви наполы не поживут дней своих (Псалом 54).

Коротко говорячи, караеть Богъ розличне убійство, и полно о том везде у Святомъ Писанью, и на око сами видимы, яко Богъ и тайных убійцевъ дивными обычайми выявляеть.

ПЫТАНЬЕ

Што оным будеть, которіи того слова шостого стерегуть? То естъ которіи не забивають, але милосердие над ним чинять, боронять, радою, лекарством остереженіемъ и иными обычайми ему помагають, гневъ отпушчають, а коротко - и на теле, и на души оживляють, што, мовлю, таковымъ будеть?

ОТКАЗЪ

Тіи безъ отдарованья быти не могуть, Сам бо Спаситель рече: "Блажени милостивіи, яко тіи помиловани будутъ" (Мат. 5:7). А на иномъ месте тако рече: "Отпушчайте и отпустят вамъ" (Лука 6:37).

ПЫТАНЬЕ

Говори семое слово Божіих заповедей.

ОТКАЗЪ

Семое слово естъ: "Не любодей, або не чужоложь".

ПЫТАНЬЕ

Яко ся тое слово розумееть, а чого нам зде Богъ заказуеть?

ОТКАЗЪ

Потому жь, яко и иные вси заповеди. Се естъ тако розумети, яко Хрістос Сам толъкуеть. То естъ, ижь не толко человекъ на теле от блуда чистъ быти маеть, але и на сердци а на души. Бо тако рече: "Слышасте, яко речено быстъ пръвим: "Не прелюбы сътвориши", Азъ же глаголю вам, яко всякъ, иже възрить на жену съ похотію, оуже любыдействова с нею въ сердци своемъ". А от тых словъ розумети можем, кто тое слово исполняеть, а якового послушества Богъ по насъ хочеть.

Другаа надобе памятовати, иже ся двоя речь у томъ слове, яко и в иных, заховуеть. Перваа речь - чого Богъ заказуеть. Другаа речь - которую мети хочеть. Бо мало на томъ, иже кто не блудить, а предся на сердци похотію горить, потреба, абы того не мелъ, то естъ, абы жону понялъ, яко Апостолъ рече: "Добро естъ жене не прикасатися, любодеаніа же, единый каждый свою жену да имать". А мало нижей : "Лепей ест женитися, нежели разжигатися".

ПЫТАНЬЕ

Которие суть дела добриа сего слова?

ОТКАЗЪ

Напервей чистоту заховати на сердци своем, не мыслити о плюгастве и о всякой нечистоте, але только о чистоте.

Жону свою миловати, а жоне мужа, а не только миловатися должни, але и в оучтивости ся мети, верю собе заховати, встыдъ межи собою держати. Опять, оных речей стеречися, которие къ блуду приводять, або къ розжиганью или нечистым мыслям, яко Апостолъ рече: "Не оупиваитеся вином, в нем же естъ блудъ" (Еф. 5). Потому же и Сам Хрістос рече: "Вънемлете себе, да некогда отягчяют сердца ваша обьяденіем и пианьством, и печальми житейскими" (Лука 21:34). На остатокъ потому справовати свое тело, абы было обитель Святого Духа.

Сие суть добрые дела сего слова.

ПЫТАНЬЕ

Которие суть грехи противу сему слову?

ОТКАЗЪ

Напервей естъ грехъ на сердци нечистоту мыслити. Потомъ слова плюгавые говорити. Песни сромоцьские пети, корогоды водити, плясати и таковаа чинити. Бо сие дела къ блуду тягнуть человека, и прото ихъ Богъ у томъ слове заказуеть чинити.

Опять, грех естъ мужу от жоны, а жене от мужа выступовати. Грех естъ жоны, кому ее надобе, не взяти. Бо таковъ мусить всегда розжигатися, а таковое розжигание естъ грехъ пред Богомъ. Грехъ естъ жону отпушчати, разве блуда деля не грехъ.

Грешать и они, которыи для убожества своего женитися не хотять. Грешять противу тому слову вси нечистіи любодеици, прелюбодеици, мужоложници, скотоложници, содомляне и прочіи.

ПЫТАНЬЕ

Што за казни Богъ допушчаеть для нечистоты або прелюбыдеиства?

ОТКАЗЪ

В Законе велелъ Богъ таковыхъ каменьемъ побивати, яко написано у Пятой книзе Моисеове (Глав. 22). Але и по вси веки каралъ Богъ нечистые люди. Яко напервей весь светъ не для жадъное вины потопилъ, только для ідолослуженіа, обиды нишчих а для плюгаства. На Содомъ того жь деля Богъ огнистый дошчъ спустилъ.

Сихемъ, сынъ Емморовъ, взялъ силою дочъку Іакова Дину и насилие ей учинилъ, але опять братья ее Симіонъ и Леви того деля не только Сихема, но и отца его, и весь город выбили (Бытья 34).

В Судьяхъ написано, яко одного леоувита жену мешчане Гавааньские от колена Веніаминова споганили и насилиемъ заморили (Су 20). Да вед же за тое от колена Веніаминова 25 тисечи мужов убили сынове Ізраилеви, женъ пакъ мало зосталося.

Сынове Ізраілеви, живучи в пустыни, допустилися блуда з дочками Моавскими (Числа 26; 1 Кор. 18), але для того 23 тисечи згинуло. Дывад за прелюбыдеаніе много и с поддаными своими утерпелъ (2 Цар. 12). Сынъ Давыдовъ Амномъ сестре своей Фамаре насилие учинилъ, але скоро от Авесалома убить (2Цар. 14).

Іаковъ сына своего Рувима проклялъ, иже постелю его посквернилъ (Бытя 49).

Полно таковых казней у Святом Писанію, але съ всих нагоршаа казнь естъ, иже вси нечистіи, естли ся не покають, животъ вечный собе потерають. Тако бо Апостолъ пишеть: "Ни блудници, ни прелюбодеи, ни телосквернители, ни мужеложници Царствіа Божіа не наследять" (1Кор 6:9-10). Тое жь къ Галатом рече: "Явна суть дела плотъскаа, яже суть прелюбодеаніе, блудъ, нечистота, скверневъство, таковаа творяшчей Царствія Божіа не наследять" (Гал. 5:19-21).

Потому же и къ Евреомъ пишеть: "Блудъником и прелюбыдеемъ судить Богъ" (Евр 13:14). А на иномъ месте сведчить, яко для блуда, нечистоты, руйности и иных приходить гневъ Божій на сыны противленіа (Кол 3:5-6). Сие грозбы вельми суть страшны, а предся и собе люди мало важять, ани мають за грехъ нечистоты. Але Хрістианинъ маеть ведати, яко часу своего всехъ таковых Богъ скараеть. Сам бо рече у пророка: "Азъ есмъ Господь Богъ вашь, не изменюся". Если преже каралъ, и теперь карати будеть.

Прото обачися кажный, што чинишь, не разгневи собе Господа, не кохайся в нечистоте, послухай словъ Апостолских, где рече: "Не весте ли, яко телеса ваша удове Хрістовы суть? Тем ли убо оуды Хрістовы сътворяемъ уды любодейца? Да не будеть. Или не весте, яко прилепляяйся любодеици, едино тело естъ? А прилепляайся Господеви, единъ Духъ естъ. Бегайте любодеанія. Всяк бо грехъ, иже ашче сътворить человекъ, кроме тела естъ, а творяй любы, въ свое тело съгрешаеть. Или не весте, яко телеса ваша храмъ, иже въ васъ Святому Духу естъ, Его же имате от Бога?" (1Кор 6:15-19).

ПЫТАНЬЕ

Што тымъ будеть, они же сее слово полънять?

ОТКАЗЪ

За сердечъную чистоту обецуеть самъ Хрістос великое блаженьство, где рече: "Блажени чистіи сердцемъ, яко тіи Бога оузрять" (Мат 5:8). А над тое и телесными речми таковых людей Богъ богатить, даючи имъ слушное выхованье. Яко Хрістос далъ знати, будучи на браце у Кане Галиліиской, бо егда имъ не достало вина, пособилъ имъ, учинивъши з воды вино (Іоанъ 2:1-10).

Не малаа теже естъ ласка Божіа, ижь чистыхъ людей тела чинить храмом Святого Духа. Потому жь и жоны мають обетнцу, которие в малженстве живуть, верю мужомъ заховують, а о детех працу пріимають. Тако бо Апостолъ рече: "Жена спасется ради чадородиа, ашче пребудеть въ вере и любви, и въ святини съ целомудріем" (1Тім 2:14-15).

Видишь ли, што Духъ Святый женамъ обецуеть? Розумъ человечи за мерскую речь почитаеть чадородие, а девство за ангелъскій животь маеть, але зде не потому Святый Духъ судить: "Спасеться, дей, жена чадородия деля". От которих бы словъ могли людие зацность женитвы познати. Яко тот же Апостолъ къ Евреомъ пишеть: "Честна женитва въ всехъ и ложе нескверно" (Евр 13:14). Где рече "въ всехъ", розумей, яко бы реклъ "межи всехъ, никого не выимаючи".

Далей

Зьмест

Тытульны аркуш