Предъсловіе

Катихисис - слово ест греческого языка, сказует же ся на словенскую речь - Оглашение или гласом учение.

Ведомо бо маеть быти, ижь апостоли и их ученници не тако скоро и не так латве, от еллин или от жидов к вере Христовой приступующись, тайнами святыми служили. И окрестил убо Пётр и иншии апостоли на день съшествиа святого духа от людей израилевых три тисечи, але умиливши их ся сердцем и любезно приемших слово окрестил Филипп, иже от седми диакон царици Муринъское земли каженика или скопца, але аже из Муринъское земли в Еросолим поклонитися приехавъшаго, а наболей через анъгела показаного, от себе научоного и еще веру о Христе, ижь сын Божий ест, исповедавъшаго.

Окрестил Петр еще Корънилиа, але оного, которого молитвы и милостины възыдоша пред Богом, оного, о котором глас Божий в видении по три крать рече, иже Бог очистил ест, ты не скверъни, оного, на которого Дух Святый видимым образом еще научающу Петру напал. Окрестил апостол Сила сторожа темъничъного в Филипъпусех, але ажь перъвей к апостолом каючися поведел: "Господие, что ми подобаеть творити, да спасуся?" Але аже перъвей Павел и Сила глаголаста ему слово Господне; еще аже перъвей понял их в дом свой и омыл их раны. Инъшие места опущаю. Досыт бо явъно, ижь апостоли никого от поган и от жидов не крестили, аже перъвей оного научили и в вере искусили.

Потом пак и труднейшее искушение было настало на хотящих креститися. Находим бо в посланиах учительских и в некоторих правилех, ижь котории ся крестити хотели, перъвей через немалый час повинъни били опричь в церъкви стояти, на колена припадати, чтение еванъгелское услышавъши, а наболей, коли уже мелася вечера Господня зачинати, вън из церъкви выходити, певъный час поститися и на каждой недели в четверг "верю" пред епископом или пред презвитером исповедати. А докул таковые речи кто выполънил, крещон не был, але такового звано оглашеным, а по-гречески - катикуменос. Науку пак их таковую Оглашением, по-гречески - Катихисис.

Был то обычай вельми потребный и пожиточъный, бо затым многые и в познание Бога и его правды приходили, и в святом житью росли и укреплялися. К тому и учители мусели своего уряду быти пилъными. Лечь диавол не допустил сему обычаю долъго межи хрестианъми стояти, свящим бо человеком, по слову еванъгелскому, прииде и въсеял плевелы, се ест, коли ся ленили учити людей, научил их диавол, абы верили, иж без науки, без веры и без исповеданиа можеть человек спасен быти, тольки бы водою в детинъстве окрещон был, а пришедши к розуму, только бы в певъные дни мяса не ел, милостину хотя жь от злого набытя давал, святым ся молил и таковые речи заховал.

А на остаток на тое ся спущали, естли кто мел, што бы попом по души дал, абы тело на посвященой земли положили, проводили, поминали, третины, деветины, полсорочины, сорочины, полъгодины и годины и инъшие таковые вымыслы чинили. Для того именья, села, места отписовали, монастыри и будованые черъкви надавали, або знову будовали колоколы, потирионы, дыскосы, ризы, иконы или балъваны куповали, надеваючися для таковых справ спасениа, царствиа божиего и живота вечъного. Все тое, мовлю, затым в церъков Христову вошло, ижь он святый обычай, которого ся перъвая церъков по повелению Христову держала, допустили диаволу вывести, а шкодливы он плевел въсеяти. Христос бо рече: "Шедшеи, научите вся языки, крестяще их!" Тии пак не только не научають, але и сами мало правъды знають и оным, котории бы учити хотели, забраняють. Не иначе, но яко пред тым законъником, яко взясте ключь разумению сами не внидосте и въходящиим възбранисте!" Не надобе о том много писати. Вси бо ведаем, яковых теперь учителей маем.

Ведаеть весь свет, яко на свои степени въступають. Не тайно те же, яко на них стоять и справуются. Лепъшей плакати, нежели их норовы выписовати. Оно певная речь, ижь напрасно их поправениа в науце или в житии ждати. Лучшей, абы каждый, кто не хочеть згинути, иншого собе лекарства за часу искал, а таковым постыром покой дал. Тако бо повелеваеть Господь, где к апостолом, се ест всем учителем рече: "Вы есте соль земли! Аще же соль обуяеть, чим осолится?" Ни в что же будеть к тому, точию да и ссыпана будеть вон и попираема человекы. Солью называеть всех учителей, яко бы соль заховуеть што ею посолится, абы не провоняло. Тако и учитель наказанием, поучением и напоминаньем заховуеть людей от духовное гнили. Але если того не чинить, повелеваеть Господь вон его выкинути и потоптати, яко соль, естли бы одурела або силу свою утратила. Чого жь для непослушни есмо того повелениа самого Сына Божиего?

Заисте бы непотреба сего слова мало важити. Повинни бы есмо и на оное слово паметати: аще слепец слепца водить - оба в яму въпадетася. Слышиш ли, възлюбленый мой брате, ижь тя сам Господь остерегаеть, абы есь в яму не упал? Упадет всяк, кто ся слепому водити допущаеть. Чого жь для от таковых слепцов не бежим? Чому ся им водити допущаем? Смилуйся уже каждый над собою Бога для. Въстани от сна, уже пора обачитися. Досить есмо вже спали, коли есмо за справою сил слепцов ни Бога знали, ни о спасении своем, на чим лежить, ведали. Нехай то был час гнева Божиего за грехы предков наших, который ся за преданиа, або лепей за сны и стареческие басни, взявши, слово Божие были опустили. Мусило тако быти. Бо и святии апостоли о том прорекли и написали. Наболей Павел, сосуд изъбран Христов, тако к солуняном пишеть: "Послеть,- рече,- Бог деание льсти, веровати в лжу, да суд приимут вси неверовавшии истинне, но благоволиша неправду".

Розъсмотри, молю, ты ся, боголюбче, естли ся сиа речь святого апостола, мовлю, вышших часов не збыла? Апостол зде пишеть, яко Бог мел послати деание льсти. Сиа лесть чиа быти мела? Хиба оного, который еще в раи родителей наших прельстил? А как же тогды прельстил, толко ижь Евву от Божиего слова отвел? И иншим обычаем ему прельстити нельзя. Докуле бо человек держится слова Божиа, дотуле заблудити не можеть, поневажь свечу, которою собе светить, маеть. По оному слову светилник ногам моим - закон твой, и свет стезям моим. Але естли тую свечу потеряеть, мусить кождый заблукатися и, яко слепец, дорогы рукою щупати, яко и апостол поведаеть. Прото пророк рече: "Аще не был Господь Саваоф оставил нам семени, яко Содом убо были быхом". Семенем слово Божие называеть. Тым ти обычаем диавол прельщаеть. Ведаеть бо, ижь скоро люди отступять слова Божиего, уже все, што он схочеть, учинять. Для того и сих часов на тое был привел, ижь слова Божиего учители не казали. Зачим всякие злы речи в церкви силу взяли? Лечь ныне Бог милостивый, ужалившыся нас, открил нам грешным слово свое правдивое и чтодень значней откриваеть. Учителей ачьколвек зредка веръных посылаеть. Прото годится и нам всем метися к тому самым, абы есмо тое неизъреченное ласки вдячни были, слово Божие обема, яко мовять, руками приняли, держали, по ему жили и иных к нему приводили. А ижь жатва многа, делатель мало, того для аз недостоин, от Святыя Церкви служителей наменший, сию книжку от божественных писаний написах, абы вси слова Божия и истины разумениа жаждущии мeли, чого бы ся и сами учили и деток своих научали.

Знаю тое, ижь бы потреба сию науку достаточней выписати, але тако и час и приумение наше знесло. А ведь же напотом, естли будеть Божиа воля, может ся ширей у другое управити. Наболей четвертая часть, се ест о святом крещении и о вечери Сына Божиего, помыслити можем опричную книжку выпустити. Ласка Господа нашего Исус Христа с всими верными. Аминь.

Писан у Клецку под лeту въплощениа Господа и Спаса и Бога нашого Исус Христа 1562, июниа 10 дня.